Get Adobe Flash player
ຍິນດີຕ້ອນຮັບເຂົ້າສູ່ເວັບໄຊ ກົມວິທະຍາສາດ, ກະຊວງວິທະຍາສາດ ແລະ ເຕັກໂນໂລຊີ
ກວ ຈັດກິດຈະກຳເນື່ຶງໃນໂອກາດວັນປູກຕົ້ນໄມ້ ແລະ ວັນເດັກນ້ອຍສາກົນ

ພະແນກ ວິທະຍາສາດ ນິວເຄຼຍ

ກອງປະຊຸມສໍາມະນາແລະພົບປະປຶກສາຫາລືກ່ຽວກັບການຮ່ວມມືວິຊາການສ້າງຄວາມເຂັ້ມແຂງດ້ານການຄຸ້ມຄອງຄວາມປອດໄພກຳມັນຕະພາບລັງສີ-ນິວເຄຼຍ

IMG 20170807 WA0004

ອີງຕາມກອງປະຊຸມພົບປະ ລະຫວ່າງ ທ່ານ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ສປປ ລາວ  ແລະ ທ່ານ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ແຫ່ງ ຣາຊະອານາຈັກໄທ ຄັ້ງວັນທີ 27 ພະຈິກ 2014;

    ອີງຕາມຜົນກອງປະຊຸມຮ່ວມ ຄະນະກໍາມະການ (Joint Committee) ຮ່ວມມືດ້ານວິທະຍາສາດ, ເຕັກໂນໂລຊີ ໄທ-ລາວ ຄັ້ງທີ 2 ທີ່ຊຽງລາຍ, ຣາຊະອານາຈັກໄທ ຄັ້ງວັນທີ 02 ກຸມພາ 2017. ໃນລະຫວ່າງວັນທີ 7-8 ສິງຫາ 2017 ໄດ້ຈັດກອງປະຊຸມສໍາມະນາວິຊາການ ກ່ຽວກັບການສ້າງຄວາມເຂັ້ມແຂງດ້ານການຕິດຕາມ ແລະ ການກວດສອບຄວາມປອດໄພດ້ານກໍາມັນຕະພາບລັງສີ-ນີວເຄຼຍ ຂຶ້ນທີ່ ໂຮງແຮມ ຄຣາວພຣາຊາ, ນະຄອນຫຼວງວຽງຈັນ, ສປປ ລາວ ໂດຍໄດ້ຮັບກຽດມາເປັນປະທານ ກອງປະຊຸມ ຂອງ ທ່ານ ປອ ສຸລິອຸດົງ ສູນດາລາ, ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ແລະ ເປັນປະທານຮ່ວມ ກອງປະຊຸມ ຂອງ ທ່ານ ດຣ. ນ. ອັດຊະລາ ວົງແສງຈັນ ເລຂາທິການ ສຳນັກງານປະລຳມະນູ ເພື່ອສັນຕິ ແຫ່ງ ປະເທດໄທ, ໂດຍມີຜູ້ຕ່າງໜ້າຈາກຂະແໜງການຈາກບັນດາກະຊວງທີ່ກ່ຽວຂ້ອງກັບການພົວພັນວຽກງານຄຸ້ມຄອງຄວາມປອດໄພລັງສີ-ນີວເຄຼຍ ຂອງ ສປປ ລາວ ເຂົ້າຮ່ວມປະຊຸມປຶກສາຫາລື ເພື່ອສ້າງຄວາມເຂັ້ມແຂງດ້ານອາດສາມາດໃນການຕິດຕາມ ແລະ ກວດສອບຄວາມປອດໄພກຳມັນຕະພາບລັງສີ ແລະ ລະດັບລັງສີໃນສິ່ງແວດລ້ອມ, ເຊິ່ງກອງປະຊຸມດັ່ງກ່າວ ໄດ້ປຶກສາຫາລື ແລກປ່ຽນຄຳຄິດເຫັນທາງດ້ານວິຊາການ ແລະ ຕົກລົງເຫັນດີເປັນເອກະພາບ ດັ່ງນີ້:

  1. ຝ່າຍ ສຳນັກງານປະລຳມະນູ ເພື່ອສັນຕິ ແຫ່ງປະເທດໄທ (ປສ) ເຫັນດີໃນການສະໜັບສະໜູນ ການຝຶກອົບຮົມ ກ່ຽວກັບ ການກວດສອບວຽກງານດ້ານກຳມັນຕະພາບລັງສີ ແລະ ລະດັບລັງສີໃນສິ່ງແວດລ້ອມ, ແກ່ ພະນັກງານ ຂອງ ກະຊວງວິທະຍາສາດ ແລະເຕັກໂນໂລຊີ, ສປປລາວ ຈໍານວນ 3 ທຶນ ເປັນໄລຍະເວລາ 10 ວັນລັດຖະການ, ຈັດຂຶ້ນ ທີ່ ປສ ແລະ ປສ ໃຫ້ການສະໜັບສະໜູນຄ່າໃຊ້ຈ່າຍທີ່ກ່ຽວຂ້ອງ ທັງໝົດ.
  2. ກົມວິທະຍາສາດ, ກວຕ ຕົກລົງເຫັນດີ ໃນການລິເລີ່ມ ການສ້າງຕັ້ງໜ່ວຍງານ ສະເພາະ ຕໍ່ກັບວຽກງານຂົງເຂດການຕິດຕາມກວດສອບກຳມັນຕະພາບລັງສີ ແລະ ລະດັບລັງສີໃນສິ່ງແວດລ້ອມ, ເຊິ່ງເປັນໜ່ວຍງານ ພາຍໃຕ້ ກວຕ. ພ້ອມທັງ ປະສານງານກັບໜ່ວຍງານທີ່ກ່ຽວຂ້ອງ.
  3. ທັງສອງຝ່າຍ ເຫັນດີ ທີ່ ປສ ຈະສົ່ງຜູ້ຊ່ຽວຊານວິຊາການ ມາທີ່ ສປປ ລາວ ໃນການຊ່ວຍເຫຼືອທາງເຕັກນິກ-ວິຊາການ ໃນການຕິດຕັ້ງລະບົບກວດສອບດ້ານກຳມັນຕະພາບລັງສີ ແລະ ລະດັບລັງສີ ໃນສິ່ງແວດລ້ອມ ທີ່ສາມາດ ລາຍງານຜົນທາງອອນໄລ, ໃນເບື້ອງຕົ້ນຢ່າງໜ້ອຍ 1 ລະບົບ ແລະ ປສ ໃຫ້ການສະໜັບສະໜູນຄ່າໃຊ້ຈ່າຍທີ່ກ່ຽວຂ້ອງກັບການປະຕິບັດດັ່ງກ່າວ.
  4. ສຳນັກງານປະລຳມະນູ ເພື່ອສັນຕິ ແຫ່ງປະເທດໄທ ເຫັນດີ ໃນການສະໜັບສະໜູນ ເຄື່ອງມື ແລະ ອຸປະກອນ ທີ່ ສຳນັກງານ ໄດ້ພັດທະນາຂຶ້ນ ເພື່ອໃຊ້ໃນການກວດສອບກຳມັນຕະພາບລັງສີ ແລະ ລັງສີໃນສິ່ງແວດລ້ອມ ໃຫ້ແກ່ ກວຕ. ພ້ອມກັນນີ້, ກົມວິທະຍາສາດ, ກວຕ ຈະອໍານວຍຄວາມສະດວກ ໃນການຕິດຕັ້ງ, ຄຸ້ມຄອງນໍາໃຊ້ລະບົບ ທີ່ໄດ້ຕິດຕັ້ງຂຶ້ນ.
  5. ທັງສອງຝ່າຍ ເຫັນດີ ມີການແລກປ່ຽນຂໍ້ມູນ ທາງດ້ານກຳມັນຕະພາບລັງສີ ແລະ ລະດັບລັງສີໃນສິ່ງແວດລ້ອມ ເພື່ອປະໂຫຍດ ຂອງການປະຕິບັດໜ້າທີ່ທັງສອງຂະແໜງ ການ ເພື່ອຄວາມປອດໄພທາງລັງສີ-ນີວເຄຼຍ ຂອງປະຊາຊົນ ແລະ ສິ່ງແວດລ້ອມ ຂອງ ທັງສອງປະເທດ ໂດຍມີການແຕ່ງຕັ້ງຜູ້ປະສານງານວຽກງານດັ່ງກ່າວ ໃນຕໍ່ໜ້າ.
  6. ສຳນັກງານປະລຳມະນູ ເພື່ອສັນຕິ ແຫ່ງປະເທດໄທ ເຫັນດີໃຫ້ການບໍລິການວິເຄາະລັງສີໄອໂຊໂທບ ແລະ ປະລິມານກຳມັນຕະພາບລັງສີ ຈາກຕົວຢ່າງ ແລະ ໃຫ້ການກວດສອບວັດແທກເຄື່ອງມືວັດລັງສີ ຂອງ ສປປ ລາວ, ໂດຍບໍ່ມີຄ່າໃຊ້ຈ່າຍ ໃນການວິເຄາະ (ຍົກເວັ້ນຄ່າຂົນສົ່ງ).
  7. ສຳນັກງານປະລຳມະນູ ເພື່ອສັນຕິ ແຫ່ງປະເທດໄທ ເຫັນດີ ສະໜັບສະໜູນ ສະໜອງຂໍ້ມູນທາງດ້ານນະໂຍບາຍ ແລະ ລະບຽບກົດໝາຍ ທີ່ກ່ຽວກັບ ພະລັງງານນິວເຄຼຍ ຂອງ ປະເທດໄທ ເພື່ອ ໃຊ້ເປັນປະໂຫຍດໃນການພັດທະນາ ກົດໝາຍວ່າດ້ວຍຄວາມປອດໄພທາງລັງສີ-ນິວເຄຼຍ ຂອງ ສປປ ລາວ.  
  8. ທັງສອງຝ່າຍ ເຫັນວ່າ ປສ ມີປະສົບການ ແລະ ຄວາມຮູ້ກ່ຽວກັບ ຂະບວນການອະນຸຍາດ ແລະ ກວດສອບ ທາງລັງສີ ນິວເຄຼຍ, ການຊ້ອມແປງເຄື່ອງມືໃນເບື້ອງຕົ້ນ ແລະ ການສ້າງຄວາມເຂົ້າໃຈທາງດ້ານລັງສີ-ນິວເຄຼຍ ທີ່ສາມາດແລກປ່ຽນ ແລະ ຖ່າຍທອດ ໃຫ້ກັບ ກົມວິທະຍາສາດ, ກວຕ. ເພື່ອເປັນປະໂຫຍດໃນການຈັດຕັ້ງໜ່ວຍງານຄຸ້ຄອງທາງດ້ານລັງສີ-ນິວເຄຼຍ ຂອງ ສປປ ລາວ ໃນຕໍ່ໜ້າ.
  9. ທັງສອງຝ່າຍເຫັນດີ ໃນການຈັດຝຶກອົບຮົມສຳລັບຜູ້ປະຕິບັດງານສ່ວນໜ້າ (Front line officer)ຂອງທັງສອງປະເທດ.
  10. ທັງສອງຝ່າຍເຫັນດີ ໃນການຈັດປະຊຸມລະຫວ່າງ ສອງໜ່ວຍງານ ໃນປີ 2019 ເພື່ອຕິດຕາມການດຳເນີນງານ ຜົນຂອງກອງປະຊຸມຄັ້ງນີ້ ແລະ ກຳນົດແນວທາງການຮ່ວມມື ໃນອະນາຄົດ.
  11. ທັງສອງຝ່າຍ ໄດ້ແລກປ່ຽນຄຳຄິດຄຳເຫັນທາງວິຊາການ ຢ່າງກົງໄປກົງມາ ດ້ວຍຄວາມເຂົ້າໃຈ ພາຍໃຕ້ບັນຍາກາດໄມຕີຈິດມິດຕະພາບ ແລະ ເປັນຈຸດເລີ່ມຕົ້ນທີ່ດີ ຂອງການຮ່ວມມືກັນ ຕໍ່ໄປໃນອະນາຄົດ.
  12. ຫົວໜ້າຄະນະຂອງທັງສອງຝ່າຍ ໄດ້ສະແດງຄວາມຂອບໃຈ ແລະ ຊົົມເຊີຍ ທີ່ໄດ້ມີີຄວາມຕັ້ງໃຈ ແລະ ເອົາໃຈໃສ່ໃນປະສານງານເຮັດໃຫ້ກອງປະຊຸມບັນລຸໄດ້ເຖິງຈຸດປະສົງ ແລະ ເປົ້າໝາຍທີ່ໄດ້ວາງໄວ້ທຸກປະການ.

ກອງປະຊຸມລະຫວ່າງ ກົມວິທະຍາສາດ, ກວຕ, ສປປ ລາວ ແລະ ສໍານັກງານ ປະລຳມະນູ ເພື່ອສັນຕິ ແຫ່ງປະເທດໄທ ໄດ້ຈັດຂຶ້ນ ລະຫວ່າງວັນທີ 7-8 ສິງຫາ 2017, ທີ່ ນະຄອນຫຼວງວຽງຈັນ. ສປປ ລາວ. ພ້ອມກັນນີ້, ກໍໄດ້ເຮັດບົດບັນທຶກກອງປະຊຸມ ເປັນ 3 ສະບັບ: ພາສາລາວ 1 ສະບັບ, ພາສາໄທ 1 ສະບັບ ແລະ ສະບັບແປເປັນ ພາສາອັງກິດ 1 ສະບັບ 

ທ່ານ ປອ ສຸລິອຸດົງ ສູນດາລາ, ຮອງລັດຕະມົນຕີ ກະຊວງວິທະຍາສາດ ແລະ ເຕັກໂນໂລຊີ ໄດ້ກ່າວຄຳເຫັນການເປີດກອງປະຊຸມສຳມະນາ ແລະ ເໜັ້ນໝັກ ເຖິງບັນດາວຽກງານບຸລິມະສິດ ໂດຍຕາມຂະແໜງການທີ່ກຳນົດ ໃນ ກອບແຜນງານແຫ່ງຊາດ ແລະ ຊີ້ແຈງໃຫ້ເຫັນເຖິງ ວຽກງານທີ່ສຳຄັນ ແລະ ຈຳເປັນໃນການສ້າງພື້ນຖານໂຄງລ່າງດ້ານຄວາມປອດໄພລັງສີ-ນິວເຄຼຍ

ທ່ານ ຄຸນຍິງ ອັດຊະລາ ລຸນແສງຈັນ, ໄດ້ອະທິບາຍຄວາມເປັນມາຂອງອົງການປະລຳມະນູເພື່ອສັນຕິ ຕໍ່ກັບ ວຽການການຄຸ້ມຄອງ,ຕິດຕາມ ກຳມັນຕະພາບລັງສີສິ່ງແວດລ້ອມ ແລະ ບັນຫາສຳຄັນໃນການເຫັນໄດ້ເຖິງຄວາມຈຳເປັນໃນການສ້າງສະຖານີຕິດຕາມກວດສອບຂອງ ສປປ ລາວ

ທ່ານ ກອງໄຊສີ ພົມມະໄຊ ໄດ້ອະທິບາຍໂດຍເຂບ ສະພາບລວມຂອງການຈັດຕັ້ງປະຕິບັດວຽກງານ ລວມໄປເຖິງການລິເລີ່ມວຽກງານຈຸດປະສານແຫ່ງຊາດ ກັບ ອົງການພະລັງງາປະລຳມະນູສາກົນ

ທ່ານ ຍຸດທະນາ ຕຸ້ມນ້ອຍ, ໄດ້ອະທິບາຍ ການຈັດຕັ້ງປະຕິບັດໂຄງການ ເປັນຕົ້ນແມ່ນ ໂຄງການລະດັບພາກພື້ນ RAS9077 ແລະ ໂຄງການທີ່ກ່ຽວຂ້ອງ ໃນການດຳເນີນງານ, ພ້ອມທັງ ອະທິບາຍອຸປະກອນ ແລະ ການຕິດຕັ້ງໃນແຕ່ລະຂົງເຂດສະຖານີ.

ທ່ານ ໄມຕີຣ ສິຣີຍາ, ໄດ້ອະທິບາຍ ເຖິງ ການຝຶກອົບຮົມ ໃນແກ່ນັກສໍາມະນາກອນຂອງ ສປປ ລາວ ຕໍ່ກັບວຽກງານ ການສ້າງຕັ້ງລະບົບເຕື່ອນໄພ ກຳມັນຕະພາບລັງທາງອາກາດ ແລະ ສິ່ງແວດລ້ອມ, ພ້ອມທັງບັນດາມາດຖານ ຂອງຜູ້ເຂົ້າຮ່ວມຝຶກອົບຮົມ (ເຊິ່ງການເດີນທາງ ແມ່ນໃນວັນ 20 ສິງຫາ 2017 ແລະ ເລີ່ມ ຈັດຕັ້ງປະຕິບັດການຝຶກອົບຮົມ ໃນວັນທີ 21 ສິງຫາ 2017 ເຖິງ 2 ກັນຍາ 2017, ໄລຍະການຈັດຕັ້ງປະຕິບັດ ແມ່ນ 2 ອາທິດ)

ທ່ານ ດຣ ສົມບູນ ໂຕອຸດຊົນ: ໄດ້ການອະທິບາຍ ກ່ຽວກັບບັນດາອຸປະກອນເຄື່ອງມື ທີ່ແຕກຕ່າງກັນ ຂອງເຄື່ອງມືການກວດສອບທາງລັງສີ, ລວມໄປເຖິງລະບົບປະຕິບັດການກວດສອບວັດແທກລະດັບລັງສີສິ່ງແວດລ້ອມ (ບົນພື້ນຖານການນຳໃຊ້ເຕັກໂນໂລຊີ  Arduino) ແລະ ລະບົບຖານຂໍ້ມູນໃນການເກັບກຳ, ວິເຄາະ ແລະ ລາຍງານ ຂໍ້ມູນ. ພ້ອມ ດ້ວຍ ການປະຍຸກໃຊ້ ຄວາມຫຼາກຫຼາຍຂອງເຄື່ອງມືໃນການຕິດຕາມກວດສອບ.

ຄຳເຫັນຂອງທາງຜູ້ເຂົ້າຮ່ວມການຕົກລົງເຫັນດີໃນກອງປະຊຸມ :

ທາງຝ່າຍ ປະເທດໄທ ເຫັນດີໃນການສະໜັບສະໜູນ ການຝຶກອົບຮົມ ກ່ຽວກັບ ການຕິດຕາມ, ກວດສອບວຽກງານດ້ານກຳມັນຕະພາບ-ລັງສີ ຈຳນວນ 3 ທຶນ ຢູ່ທີ່ ບາງກອກ ປະເທດໄທ (ເຊິ່ງການຝຶກອົບຮົມດັ່ງກ່າວ ແມ່ນການລິເລີ່ມຈັດຕັ້ງປະຕິບັດວຽກງານຂອງຂົງເຂດດັ່ງກ່າວ) ແລະ ສຳນັກງານປະລຳມະນູເພື່ອສັນຕິ ແຫ່ງປະເທດໄທ ເປັນຜູ້ຮັບຜິດ ຊອບທັງໝົດ.

ທາງຝ່າຍ ສປປ ລາວ ຕົກລົງເຫັນດີ ໃນການລິເລີ່ມ ການສ້າງຕັ້ງໜ່ວຍງານ ສະເພາະ ຕໍ່ກັບວຽກງານຂົງເຂດການຕິດຕາມກວດສອບລັງສີ ສິ່ງແວດລ້ອມ ຂອງ ຝ່າຍ ກະຊວງວິະຍາສາດ ແລະ ເຕັກໂນໂລຊີ ສປປ ລາວ ພ້ອມທັງ ປະສານງານກັບບັນດາພາກສ່ວນ ຂະແໜງການທີ່ກ່ຽວຂ້ອງ ທີ່ຕິດພັນກັບ ຂົງເຂດວຽກງານດັ່ງກ່າວ. ເຫັນດີ ຕາມການສະເໜີຂອງທາງການລາວ  ທີ່ສາມາດນຳສົ່ງຕົວຢ່າງ ເພື່ອນໍາໄປວັດແທກ ທີ່ ສໍານັກງານ ປະລຳມະນູ ເພື່ອສັນຕິ ປະເທດໄທ.

ຄວາມຄິດເຫັນຂອງຜູ້ເຂົ້າຮ່ວມ:

ສະເໜີ ໃຫ້ມີມາດຕະການສະເພາະ ໃນການຕິດຕາມ, ກວດກາ ຂອງທາງໂຮງໝໍ ສຳລັບຜູ້ປະຕິບັດງານ ແລະ ຄົນເຈັບ.

IMG 20170807 WA0005IMG 20170808 WA0006IMG 20170808 WA0004IMG 20170809 WA0011